ماں اور چھ بھائی اور ایک بہن میں ترکہ کی تقسیم

 السلام علیکم و رحمتہ اللہ و برکاتہ 

کیا فرماتے ہیں علماء کرام اور مفتیان عظام کہ مرحوم زید کی 7ایکڑ زمین ہے مرحوم کے 7 بچے ہیں ان میں سے چھ لڑکے اور ایک لڑکی ہیں۔  اور ایک بیوی ہے۔

یعنی باپ کی جائداد سے ماں اور چھے بھائی اور ایک بہن کے درمیان کیسے تقسیم ہوگی اور کس کو کتنا حصہ ملے گا۔ 

  اور بہن کی شادی بھی ہوئی ہے اور بہن کے اولاد بھی ہے تو تقسیم کرتے وقت کس کو کتنا ملے گا؟

برائے مہربانی اس سوال کا جواب دے کر شکریہ کا موقع عنایت فرمائیں۔

فقط والسلام

سائل آصف رضا خان، گوا انڈیا

سائل آصف رضا خان، گوا، انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بسم اللہ الرحمٰن الرحیم 

الجواب بعون الملک الوھاب صورت مسئولہ میں بعد تقدیم ما تقدم علی الارث زید کے کل ترکہ کو بعد تصحیح 104 حصوں میں تقسیم کیا جائے۔ 

ان میں سے 13 حصے  بیوی کو دیا جائے، اور 14، 14 حصے لڑکوں کو دیا جائے۔ اور 7  حصے لڑکی کو دیا جائے۔

قرآن کریم میں ہے:

"يُوصِيكُمُ اللَّهُ فِي أَوْلَادِكُمْ ۖ لِلذَّكَرِ مِثْلُ حَظِّ الْأُنثَيَيْنِ"۔۔۔۔"فَإِن كَانَ لَكُمْ وَلَدٌ فَلَهُنَّ الثُّمُنُ"۔ (النساء: 11،12)

مفہوم:  اللہ نے حکم دیا ہے کہ لڑکا کو لڑکی کا دو گنا حصہ دیا جائے۔

اور عورت کے لیے آٹھواں حصہ ہے، جب کہ اولاد موجود ہوں۔

م8×13=104۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بیوی   لڑکا  لڑکا  لڑکا  لڑکا  لڑکا  لڑکا    لڑکی

13۔     14۔ 14۔  14۔  14۔ 14۔  14۔     7۔ 

۔۔۔۔۔۔۔   ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔   ۔۔۔۔۔۔۔۔

38115۔         41046.92      20523.46

صورت مسئولہ میں والد کے ترکہ سے اولاد کی موجودگی میں ماں کو آٹھواں حصہ ملے گا، اور لڑکا کو لڑکی کا دو گنا حصہ ملے گا۔

کل زمین کو اسی طرح 104 حصوں میں تقسیم کر کے سبھی وارثین کے حصے کے مطابق بانٹ دے۔ مثلا سات ایکڑ زمین کی کل اسکوائر فٹ (304920) تین لاکھ چار ہزار نو سو بیس ہوئے، ان میں سے بیوی کو (38115) اڑتیس ہزار ایک سو پندرہ اسکوائر فٹ دیا جائے، اور ہر ایک لڑکا کو (41046.92) اکتالیس ہزار چھیالیس عشاریہ بانوے فٹ دیا جائے، اور لڑکی کو (20523.46) بیس ہزار پانچ سو تئیس، عشاریہ چھیالیس فٹ دیا جائے۔ اگر زمین کی تقسیم میں پانچ دس عشاریہ کی کمی بیشی ہو جائے تو اسے اچھے سے ملا لے۔ واللہ تعالی اعلم بالصواب۔

(2) بہن کے ہوتے ہوئے بہن کی اولاد کو کوئی حصہ نہیں ملے گا۔ واللہ تعالی اعلم بالصواب

کتبہ محمد کلام الدین نعمانی مصباحی

بنوٹا، مہوتری، نیپال

 14/جمادی الثانی 1446ھ - 16/دسمبر 2024ء بروز پیر